ವಿನಯ್ ರಾಜ್‌ಕುಮಾರ್ ಹಾಗೂ ಅದಿತಿ ಪ್ರಭುದೇವ ಪ್ರಮುಖ ಭೂಮಿಕೆಯಲ್ಲಿರುವ “ಅಂದೊಂದಿತ್ತು ಕಾಲ’ ಚಿತ್ರದ ಮೊದಲ ಈ ಹಾಡನ್ನು ಇತ್ತೀಚೆಗೆ ಗೋಲ್ಡನ್ ಸ್ಟಾರ್ ಗಣೇಶ್ ಹಾಗೂ ಪೂಜಾಗಾಂಧಿ ರಿಲೀಸ್ ಮಾಡಿದ್ದಾರೆ. ʻʻಮುಂಗಾರು ಮಳೆಯಲ್ಲಿ ತಂದಲ್ಲೇ ನೀನಿಲ್ಲಿ ಪ್ರೀತಿಯ ಮುನ್ಸೂಚನೆʼʼ ಎಂಬ ಮೊದಲ ಹಾಡನ್ನು ಬಿಡುಗಡೆ ಮಾಡಿದೆ. ಧನಂಜಯ್ ರಂಜನ್ ಬರೆದಿರುವ ಈ ಹಾಡನ್ನು ತೀರ್ಥಹಳ್ಳಿಯ ಸುಂದರವಾದ ಹಿನ್ನೆಲೆಯಲ್ಲಿ ಚಿತ್ರಿಸಲಾಗಿದೆ. ರಘು ಆರ್.ಜೆ ನೃತ್ಯ ಸಂಯೋಜನೆ ಮಾಡಿರುವ ಈ ಹಾಡು ಈಗಾಗಲೇ ಗಮನ ಸೆಳೆದಿದ್ದು, ಮುಂಗಾರು ಮಳೆ ತಂಡದಿಂದ ಲಾಂಚ್ ಆಗಿದೆ.
ಸಿದ್ದ್ ಶ್ರೀರಾಮ್ ಹಾಡಿರೋ ರಾಘವೇಂದ್ರ ಸಂಗೀತ ಧನಂಜಯ ರಂಜನ್ ಸಾಹಿತ್ಯವಿದೆ. ಕೇಳೋದಕ್ಕೆ ಇಂಪು, ನೋಡದಕ್ಕೂ ತಂಪು ಅನ್ನಿಸೋ ಈ ನವಿರಾದ ಮೆಲೋಡಿ ಹಾಡು ಸುಧೀರ್ಘ ಕಾಲ ಕೇಳುವ ನೋಡುವ ಹಾಗಿದೆ. ಗೋಲ್ಡನ್ ಸ್ಟಾರ್ ಗಣೇಶ್, ನಿರ್ದೇಶಕ ಯೋಗರಾಜ್ ಭಟ್, ನಟಿ ಪೂಜಾ ಗಾಂಧಿ ಹಾಡನ್ನು ಬಿಡುಗಡೆ ಮಾಡಿ ಚಿತ್ರತಂಡಕ್ಕೆ ಶುಭ ಹಾರೈಸಿದ್ದಾರೆ. A2 ಮ್ಯೂಸಿಕ್ನಲ್ಲಿ ಹಾಡು ನೋಡುವುದಕ್ಕೆ ಸಿಗುತ್ತದೆ.
ಭುವನ್ ಮೂವೀಸ್ ಬ್ಯಾನರ್ ಅಡಿಯಲ್ಲಿ ಭುವನ್ ಸುರೇಶ್ ನಿರ್ಮಿಸಿರುವ ಈ ಚಿತ್ರವನ್ನು ಕೀರ್ತಿ ಕೃಷ್ಣಪ್ಪ ನಿರ್ದೇಶಿಸಿದ್ದು, ಮಾರ್ಚ್‌ನಲ್ಲಿ ಬಿಡುಗಡೆ ಮಾಡುವ ಸಾಧ್ಯತೆ ಇದೆ. ಸಂತೋಷ್ ಮುಂದಿನಮನೆ ಸಂಭಾಷಣೆಗೆ ಸಹಕರಿಸಿದ್ದಾರೆ ಮತ್ತು ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡಿದ್ದಾರೆ. ಚಿತ್ರಕ್ಕೆ ಅಭಿಷೇಕ್ ಅವರ ಛಾಯಾಗ್ರಹಣ ಮತ್ತು ಎಆರ್ ಕೃಷ್ಣ ಅವರ ಸಂಕಲನವಿದೆ. ರಾಗಣದಲ್ಲಿ ವಿನಯ್ ರಾಜಕುಮಾರ್, ಅದಿತಿ ಪ್ರಭುದೇವ, ನಿಶಾ ರವಿ ಕೃಷ್ಣನ್,ಜಗ್ಗಪ್ಪ, ಗೋವಿಂದೇ ಗೌಡ,ಇನ್ನೂ ಮುಂತಾದವರು ಇದ್ದಾರೆ.
ಅಂದಹಾಗೆ ವಿನಯ್ ರಾಜ್‌ ಕುಮಾರ್ ಅವರ ಈ ಚಿತ್ರವೂ ತುಂಬಾ ಲೇಟು. ಶುರುವಾಗಿದ್ದು 2021ರಲ್ಲಿ. ಆಗಿನ್ನೂ ಚಿತ್ರದ ನಾಯಕಿ ಆದಿತಿ ಪ್ರಭುದೇವ ಮದುವೆ ಆಗಿರಲಿಲ್ಲ. ಈಗ ಆದಿತಿ, ಒಂದು ಮಗುವಿನ ತಾಯಿ. ಇಸವಿ 2025. ಪುನೀತ್‌ ರಾಜ್‌ ಕುಮಾರ್ ಅವರು ಕ್ಲಾಪ್‌ ಮಾಡಿ ಶುರುವಾದ ಸಿನಿಮಾ ಇದು.
ಚಿತ್ರದಲ್ಲಿ 90ರ ದಶಕದ ಕಥೆ ಇದ್ದು, 1990ರಿಂದ 2006ರವರೆಗಿನ ಕಾಲಘಟ್ಟದಲ್ಲಿ ನಡೆಯುವ ಪಯಣದ ಹೆಜ್ಜೆ ಗುರುತುಗಳು ಈ ಚಿತ್ರದಲ್ಲಿವೆ. ಈ ಚಿತ್ರದಲ್ಲಿ ವಿನಯ್ ನಿರ್ದೇಶಕನಾಗಿಯೇ ನಟಿಸಿದ್ದಾರೆ. ಮೊಬೈಲ್‌, ಇಂಟರ್‌ನೆಟ್‌ ಇಲ್ಲದಾಗಿನ ಕಾಲದಲ್ಲಿ ಜನರ ಜೀವನ ಹೇಗಿತ್ತು, ಅವರ ನಡುವೆ ಕಮ್ಯೂನಿಕೇಷನ್‌ ಯಾವ ರೀತಿ ನಡೆಯುತ್ತಿತ್ತು ಅನ್ನೋದನ್ನು ಚೆಂದದ ಪ್ರೇಮಕಥೆಯ ಮೂಲಕ ಹೇಳಲಾಗುತ್ತಿದೆ. ಚಿತ್ರದ ಮತ್ತೊಬ್ಬ ನಾಯಕಿಯಾಗಿ ‘ಗಟ್ಟಿಮೇಳ’ ಖ್ಯಾತಿಯ ನಿಶಾ(ಅಮೂಲ್ಯ) ಕಾಣಿಸಿಕೊಂಡಿದ್ದಾರೆ.
ಇನ್ನು ಹಾಡು ರಿಲೀಸ್ ಮಾಡಿದ ಗಣೇಶ್, ಯೋಗರಾಜ್ ಭಟ್ ಮತ್ತು ಪೂಜಾ ಗಾಂದಿ ಎಲ್ಲರಿಗೂ ತಮ್ಮ ಮುಂಗಾರು ಮಳೆ ಸಿನಿಮಾ ಹಾಗೂ ಆ ಚಿತ್ರದ ಹಾಡುಗಳು ನೆನಪಾದವು. ಇನ್ನು ಅಂದೊಂದಿತ್ತು ಕಾಲ.. ವಿನಯ್ ರಾಜ್‌ ಕುಮಾರ್ ಅವರಿಗೆ ಅಗತ್ಯ ಇರುವ ಹಿಟ್‌ ಕೊಡುತ್ತದೆಯೋ.. ಇಲ್ಲವೋ.. ಎನ್ನುವುದನ್ನು ಕಾದು ನೋಡಬೇಕು.
